Pontevedra volcou o seu corazón futbolístico na figura de Manolo Barreiro coa homenaxe que tivo lugar o 29 de maio de 2022. Rotulábase oficialmente o Centro Municipal de Fútbol, que desde 2021 leva o seu nome.

Unha homenaxe que non puido celebrarse antes por mor da pandemia pero que estivo chea do calor de amigos, familiares e representantes institucionais. Foi un acto cheo de emocións, anécdotas, lembranzas e os grandes valores que sobrevoan o deporte: humildade, traballo, compromiso, equipo, entrega, e sobre todo amor polo fútbol. 

Foi un acto presentado polo xornalista Ramiro Espiño: “Manolo non só é amigo de todos nós, Senón que cando todos nós nacemos, xa el esaba cansado de axudar a todo o que xogaba ao fútbol. Que bonita esta homenaxe, e qué merecida”.

Tino Fernández: lembranzas xuvenís

Tino Fernández botou man das suas lembranzas xuvenís. O Concelleiro de Deportes aínda levaba pantalón curto cando coñeceu a Barreiro. Únenlles profundos lazos afectivos e familiares. “É difícil entender o fútbol en Pontevedra sen Manolo Barreiro: compañeirismo, constancia, vontade, traballo… vaias onde vaias, ninguén che dirá nada malo sobre el”. A piques de chorar de emoción, dixo que era unha honra e unha satisfacción impulsar e participar nesta homenaxe.

Rafa Saez: «O motor do fútbol»

Rafael Saez e Francisco Carrillo foron os motores da decisión de denominar Manolo Barreiro os vellos campos da Xunqueira, en nome de todos os equipos de fútbol da cidade, unha iniciativa que chegou ao Concello e a Corporación aprobou de xeito unánime. Pero Saez foi máis aló: “non só no campo da política obtivemos un enorme respaldo, senón no mundo do deporte, da familia, do conxunto da sociedade, xa que a dimensión de Manolo Barreiro abrangue a moitas xeracións de futbolistas e clubes, das que foi un motor permanente durante tantísimos anos”.

“Grazas pola túa grandeza, pola bonomía, polos teus grandes valores persoais, Manolo”, dixo Rafa Saez antes de agradecer ao Servizo Municipal de Deportes, e en especial ao seu responsable, Jaime Agulló, “ a extraordinaria dedicación prestada a esta homenaxe en todas as súas dimensións”. Rematou cunha frase lapidaria: “Se xa eras moi moi querido, a partir de agora serás inesquecible”.

José Manuel Fernández: Un libro de estilo

O vicepresidente da Real Federación Galega de Fútbol, entidade á que Barreiro estivo ligado toda a súa vida, referiuse a el como “un dos nosos”. Para José Manuel Fernández, “Manolo é un libro de estilo que recolle as mellores cousas do deporte: humildade, sinxeleza, entereza, firmeza, honradez. Queremos perpetuar o seu legado con esta denominación, porque figuras coma esta engrandecen o fútbol e son un espello no que mirármonos”.

Tere Abelleira: «un referente»

En representación do deporte tomou a palabra Tere Abelleira, a xogadora pontevedresa do Real Madrid e a selección española, quen acudiu á homenaxe acompañada dos seus avós. Cualificou a Barreiro como “referente para o deporte”, unha figura que sempre animou a todos os clubes e que impulsou tamén o fútbol feminino. Dixo que seguir os pasos de Manolo Barreiro era unha aspiración que deberan ter todos os deportistas.

Gregorio Agis: Espléndida iniciativa

O deputado provincial Gregorio Agis trouxo a voz da Deputación de Pontevedra á homenaxe de renomeamento dos campos, cualificando a iniciativa como espléndida. Mostrouse encantado de que un espazo tan entrañable levase o nome de Barreiro, porque se trataba dun grande referente para este deporte. Ao tratarse do organismo provincial, o presentador quixo destacar que Barreiro percorría todos os campos de fútbol da provincia de Pontevedra sen que en ningún deles fose mal recibido.

Jesús Barreiro: Transmitimos o que nos enseñou

A familia de Barreiro, de 97 anos de idade, estivo representada polo seu neto, Jesús, quen tivo que interrumpir o seu relato algunha vez porque a emoción era inmensa. Normal, pois lembrou á súa aboa e a outras persoas da familia. “Unha familia que non sabemos se era a primeira ou a segunda, porque a familia do fútbol era tan potente que non sabería dicir eu”, dixo con nostalxia.

“Nós estamos transmitindo agora aos seus bisnetos, e tamén a todos os que se dediquen ao fútbol, os grandes valores de Barreiro: o traballo en equipo, respectar ao rival, e sobre todo ser humildes… é o que o avó nos enseñou durante toda a súa vida”.

Alcalde Lores: Un exemplo e un orgullo

“Non vou repetir todos os grandes valores que representa a figura de Barreiro, porque xa todo se dixo. É un exemplo e un orgullo para todos nós e para o mundo do fútbol de Pontevedra”. Con estas palabras, o alcalde quixo sumarse á opinión de todos os presentes. “Manolo Barreiro leva no fútbol desde o ano en que nacín eu, no 54. Nese tempo coñece todos os campos do concello, incluso impulsou algún deles como o de Marcón, que está en proceso de pasar a competencia municipal, para garantir o seu correcto mantemento”. Lembrou tamén a Liga das Rías Baixas, impulsada por Barreiro, e na que Lores chegou a xogar. “Xente coma ti, amigo —dixo dirixíndose a Barreiro— fai que a sociedade sexa mellor”.